ದೀರ್ಘಕಾಲಿಕ ರೋಗಿಗಳ ಸುರಕ್ಷಿತ ಆರೈಕೆಗೆ ಮೆಡಿಕವರ್ ಆಸ್ಪತ್ರೆಗಳ ವಿಶೇಷ ಅಭಿಯಾನ

ಬೆಂಗಳೂರು :ವಿಶ್ವ ರೋಗಿಗಳ ಸುರಕ್ಷತಾ ದಿನದ ಅಂಗವಾಗಿ ಮೆಡಿಕವರ್ ಆಸ್ಪತ್ರೆ ಹೂಡಿ ಬೆಂಗಳೂರಿನಿಂದ ರೋಗಿಗಳು, ಅವರ ಕುಟುಂಬ ಸದಸ್ಯರು ಹಾಗೂ ಆರೋಗ್ಯ ಸಿಬ್ಬಂದಿಗಾಗಿ ವಿಶೇಷ ಜಾಗೃತಿ ಕಾರ್ಯಕ್ರಮವನ್ನು ಆಯೋಜಿಸಿದೆ. ಈ ವರ್ಷದ ಜಾಗತಿಕ ವಿಷಯವಾದ “Safe Care for Non-Communicable Diseases” (ಸಾಂಕ್ರಾಮಿಕವಲ್ಲದ ಕಾಯಿಲೆಗಳಿಗೆ ಸುರಕ್ಷಿತ ಆರೈಕೆ) ಎಂಬ ವಿಶ್ವ ಆರೋಗ್ಯ ಸಂಸ್ಥೆಯ (WHO) ಸಂದೇಶದ ಹಿನ್ನೆಲೆಯಲ್ಲಿ, ಕ್ಯಾನ್ಸರ್, ಹೃದಯ ಕಾಯಿಲೆ, ಮಧುಮೇಹ, ಪಾರ್ಶ್ವವಾಯು ಹಾಗೂ ದೀರ್ಘಕಾಲಿಕ ಉಸಿರಾಟದ ಕಾಯಿಲೆಗಳಂತಹ ದೀರ್ಘಕಾಲದ ಆರೋಗ್ಯ ಸಮಸ್ಯೆಗಳ ಚಿಕಿತ್ಸೆಯನ್ನು ಪ್ರತಿಯೊಂದು ಹಂತದಲ್ಲೂ ಸುರಕ್ಷಿತವಾಗಿಸುವ ಕುರಿತು ಕಾರ್ಯಕ್ರಮದಲ್ಲಿ ಅರಿವು ಮೂಡಿಸಲಾಗುತ್ತದೆ.

ಭಾರತದಲ್ಲಿ ಸಾಂಕ್ರಾಮಿಕವಲ್ಲದ ಕಾಯಿಲೆಗಳು (NCDs) ಒಟ್ಟಾರೆ ಸಾವಿನ ಪ್ರಮುಖ ಕಾರಣಗಳಾಗಿವೆ. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಆರೋಗ್ಯ ಸೇವೆ ಪಡೆಯುವ ಪ್ರತಿ 10 ರೋಗಿಗಳಲ್ಲಿ ಸುಮಾರು ಒಬ್ಬರು ಚಿಕಿತ್ಸೆಯ ಸಂದರ್ಭದಲ್ಲಿ ಹಾನಿಯನ್ನು ಅನುಭವಿಸುವ ಸಾಧ್ಯತೆಯಿದ್ದು, ಇಂತಹ ಘಟನೆಗಳಲ್ಲಿ ಸುಮಾರು ಅರ್ಧದಷ್ಟು ಘಟನೆಗಳನ್ನು ತಡೆಗಟ್ಟಬಹುದಾಗಿದೆ. ದೀರ್ಘಕಾಲಿಕ ಕಾಯಿಲೆಗಳಿಂದ ಬಳಲುತ್ತಿರುವ ರೋಗಿಗಳು ಪದೇಪದೇ ಆರೋಗ್ಯ ಸೇವೆ ಪಡೆಯುವುದು, ಸಂಕೀರ್ಣ ಚಿಕಿತ್ಸಾ ಕ್ರಮಗಳು, ಹಲವು ಔಷಧಿಗಳ ಸೇವನೆ ಹಾಗೂ ವಿವಿಧ ಹಂತಗಳ ಆರೋಗ್ಯ ಸೇವೆಗಳ ನಡುವೆ ವರ್ಗಾವಣೆಯಾಗುವುದರಿಂದ ಸುರಕ್ಷತಾ ಅಪಾಯಗಳಿಗೆ ಹೆಚ್ಚು ಒಳಗಾಗುತ್ತಾರೆ. ತಪ್ಪಾದ ಔಷಧ ಪ್ರಮಾಣ, ಔಷಧಿಗಳ ನಡುವಿನ ಪರಸ್ಪರ ಕ್ರಿಯೆಗಳು ಹಾಗೂ ಅಗತ್ಯವಾದ ಫಾಲೋ-ಅಪ್ ತಪ್ಪಿಹೋಗುವುದು ಸೇರಿದಂತೆ ಹಲವು ಸಂದರ್ಭಗಳಲ್ಲಿ ಸಮಸ್ಯೆಗಳು ಉಂಟಾಗಬಹುದು.

ಈ ಬಗ್ಗೆ ಮಾತನಾಡಿದ ಹಿರಿಯ ತಜ್ಞ ವೈದ್ಯರಾದ ಡಾ ನಾಗಾ ಶ್ರೀನಿವಾಸ್ ಹೃದಯರೋಗ ತಜ್ಞ, ದೀರ್ಘಕಾಲಿಕ ಕಾಯಿಲೆಗಳ ಚಿಕಿತ್ಸೆಯಲ್ಲಿ ಸುರಕ್ಷತೆ ಯಾವ ಹಂತಗಳಲ್ಲಿ ದುರ್ಬಲವಾಗಬಹುದು ಮತ್ತು ರೋಗಿಗಳು ಹಾಗೂ ಕುಟುಂಬದವರು ತಮ್ಮ ಸುರಕ್ಷತೆಯನ್ನು ಹೇಗೆ ಹೆಚ್ಚಿಸಿಕೊಳ್ಳಬಹುದು ಎಂಬುದರ ಕುರಿತು ಮಾತನಾಡಲಿದ್ದಾರೆ.

ಮುನ್ನೆಚ್ಚರಿಕೆ ಕ್ರಮವಾಗಿ ಎಚ್ಚರಿಕೆಯ ಲಕ್ಷಣಗಳನ್ನು ಆರಂಭದಲ್ಲೇ ಗುರುತಿಸುವುದು, ವೈದ್ಯರು ಸೂಚಿಸಿದ ರೀತಿಯಲ್ಲೇ ಔಷಧಿಗಳನ್ನು ಸೇವಿಸುವುದು, ಪ್ರಮುಖ ಆರೋಗ್ಯ ಅಂಶಗಳನ್ನು ನಿಯಮಿತವಾಗಿ ದಾಖಲಿಸುವುದು ಮತ್ತು ವೈದ್ಯರ ಭೇಟಿಯ ಸಂದರ್ಭದಲ್ಲಿ ಯಾವುದೇ ಪ್ರಶ್ನೆಯನ್ನು ಉತ್ತರಿಸದೆ ಉಳಿಸದಿರುವುದರ ಮಹತ್ವವನ್ನು ಅವರು ವಿವರಿಸಲಿದ್ದಾರೆ.

ವಿಶೇಷವಾಗಿ ಹೃದಯ ಚಿಕಿತ್ಸೆಯಲ್ಲಿ ಹಲವು ವಿಭಾಗಗಳ ತಜ್ಞರ ಸಮನ್ವಯ, ದೀರ್ಘಕಾಲದ ಫಾಲೋ-ಅಪ್ ಅಗತ್ಯವಿರುತ್ತದೆ. ಹೀಗಾಗಿ, ಚಿಕಿತ್ಸಾ ತಂಡದ ಜವಾಬ್ದಾರಿಯಷ್ಟೇ ರೋಗಿಯು ತನ್ನ ಚಿಕಿತ್ಸಾ ಯೋಜನೆಯನ್ನು ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳುವುದೂ ರೋಗಿಯ ಸುರಕ್ಷತೆಗೆ ಅತ್ಯಂತ ಮುಖ್ಯವಾಗಿದೆ.

‘Ask Your Doctor 5’ ಸುರಕ್ಷತಾ ಕಾರ್ಡ್

ಈ ನಿಟ್ಟಿನಲ್ಲಿ, ಕಾರ್ಯಕ್ರಮದ ಅಂಗವಾಗಿ ಆಸ್ಪತ್ರೆಯು ಪ್ರತಿಯೊಬ್ಬ ರೋಗಿಗೂ “Ask Your Doctor 5” ಎಂಬ ಸುರಕ್ಷತಾ ಕಾರ್ಡ್ ವಿತರಿಸಲಿದೆ. ಪ್ರತಿ ವೈದ್ಯರ ಭೇಟಿಯ ಸಂದರ್ಭದಲ್ಲಿ ರೋಗಿಗಳು ಈ ಐದು ಪ್ರಶ್ನೆಗಳನ್ನು ಕೇಳುವಂತೆ ಕಾರ್ಡ್ ಪ್ರೋತ್ಸಾಹಿಸುತ್ತದೆ:

1.  ಈ ಔಷಧಿ ಯಾವುದಕ್ಕಾಗಿ? ಇದನ್ನು ನಿಖರವಾಗಿ ಹೇಗೆ ಸೇವಿಸಬೇಕು?
2.  ನಾನು ಸೇವಿಸುತ್ತಿರುವ ಇತರ ಔಷಧಿಗಳೊಂದಿಗೆ ಇದು ಯಾವುದೇ ರೀತಿಯ ಪರಸ್ಪರ ಪರಿಣಾಮ ಉಂಟುಮಾಡಬಹುದೇ?
3.  ಯಾವ ಎಚ್ಚರಿಕೆಯ ಲಕ್ಷಣಗಳು ಕಂಡುಬಂದರೆ ತಕ್ಷಣ ಆಸ್ಪತ್ರೆಗೆ ಬರಬೇಕು?
4.  ಮನೆಯಲ್ಲಿ ನಾನು ಯಾವ ಆರೋಗ್ಯದ ಅಂಶಗಳು ಅಥವಾ ಸಂಖ್ಯೆಯನ್ನು ನಿಯಮಿತವಾಗಿ ದಾಖಲಿಸಬೇಕು?
5.  ನನ್ನ ಮುಂದಿನ ಫಾಲೋ-ಅಪ್ ಯಾವಾಗ? ಅದನ್ನು ತಪ್ಪಿಸಿಕೊಂಡರೆ ಏನು ಮಾಡಬೇಕು?

ಮುಂದಿನ ದಿನಗಳಲ್ಲಿ ಸಂಸ್ಥೆಯ ವಿವಿಧ ಹೊರರೋಗಿ ವಿಭಾಗಗಳಲ್ಲಿ (OPD) ಚಿಕಿತ್ಸೆ ಪಡೆಯುವ NCD ರೋಗಿಗಳಿಗೂ ಈ ಕಾರ್ಡ್ ಅನ್ನು ವಿತರಿಸಲಾಗುತ್ತದೆ.

ಈ ಬಗ್ಗೆ ಮಾಹಿತಿ ನೀಡಿದ ಡಾ ನಾಗಾ ಶ್ರೀನಿವಾಸ್ ಹೃದಯರೋಗ ತಜ್ಞ “ದೀರ್ಘಕಾಲಿಕ ಕಾಯಿಲೆಗಳ ಚಿಕಿತ್ಸೆಯಲ್ಲಿ ಸಂಭವಿಸುವ ಹೆಚ್ಚಿನ ಸಮಸ್ಯೆಗಳು ಶಸ್ತ್ರಚಿಕಿತ್ಸಾ ಕೊಠಡಿಯಲ್ಲೇ ಸಂಭವಿಸುವುದಿಲ್ಲ. ವೈದ್ಯರು ನೀಡಿದ ಔಷಧಿ ಸೂಚನೆ ಮತ್ತು ಔಷಧಿ ಪಡೆಯುವ ಹಂತದ ನಡುವೆ, ಒಬ್ಬ ತಜ್ಞ ವೈದ್ಯರಿಂದ ಮತ್ತೊಬ್ಬ ತಜ್ಞ ವೈದ್ಯರ ಬಳಿಗೆ ಚಿಕಿತ್ಸೆಯ ವರ್ಗಾವಣೆಯ ನಡುವೆ ಹಾಗೂ ಆಸ್ಪತ್ರೆಯಿಂದ ಬಿಡುಗಡೆಯಾದ ನಂತರ ಮುಂದಿನ ಭೇಟಿಯವರೆಗಿನ ಅವಧಿಯಲ್ಲಿ ಉಂಟಾಗುವ ಅಂತರಗಳಲ್ಲಿ ಸಮಸ್ಯೆಗಳು ಎದುರಾಗಬಹುದು. ಈ ಅಂತರಗಳನ್ನು ಕಡಿಮೆ ಮಾಡುವುದು ಎಲ್ಲರ ಜವಾಬ್ದಾರಿಯಾಗಿದೆ. ಚಿಕಿತ್ಸೆಯ ಬಗ್ಗೆ ಅರಿವು ಹೊಂದಿರುವ ರೋಗಿಯೇ ನಮ್ಮ ಅತ್ಯಂತ ಬಲವಾದ ಸುರಕ್ಷತಾ ಕವಚ,” ಎಂದು ಹೇಳಿದರು.

ಇನ್ನು ರೋಗ ತಡೆಗಟ್ಟುವಿಕೆಯ ಮಹತ್ವದ ಬಗ್ಗೆಯೂ ಜಾಗೃತಿ ಮೂಡಿಸಲಾಗುತ್ತದೆ. ಸಮತೋಲಿತ ಆಹಾರ, ನಿಯಮಿತ ದೈಹಿಕ ಚಟುವಟಿಕೆ, ಸಾಕಷ್ಟು ನಿದ್ರೆ, ಒತ್ತಡ ನಿರ್ವಹಣೆ, ತಂಬಾಕು ಮತ್ತು ಮದ್ಯಪಾನದ ತ್ಯಜಿಸುವಿಕೆ ಹಾಗೂ ನಿಯಮಿತ ಆರೋಗ್ಯ ತಪಾಸಣೆಗಳ ಮಹತ್ವವನ್ನು ವಿವರಿಸಲಾಗುತ್ತದೆ. “ರೋಗ ಬಂದ ನಂತರ ಚಿಕಿತ್ಸೆ ಪಡೆಯುವುದಕ್ಕಿಂತ, ರೋಗ ಬರದಂತೆ ತಡೆಯುವುದೇ ಅತ್ಯಂತ ಸುರಕ್ಷಿತ ಚಿಕಿತ್ಸೆ” ಎಂಬ ಸಂದೇಶವನ್ನು ಈ ಮೂಲಕ ನೀಡಲಾಗುತ್ತದೆ.

“Safe care for life!” ಎಂಬ 2026ರ ವಿಶ್ವ ಆರೋಗ್ಯ ಸಂಸ್ಥೆಯ ಘೋಷಣೆಗೆ ಅನುಗುಣವಾಗಿ ನಡೆಯಲಿರುವ ಈ ಕಾರ್ಯಕ್ರಮವು, ಮೆಡಿಕವರ್ ಆಸ್ಪತ್ರೆಗಳ ಜಾಲದಲ್ಲಿ ರೋಗಿ ಕೇಂದ್ರಿತ, ಪಾರದರ್ಶಕ ಹಾಗೂ ಜವಾಬ್ದಾರಿಯುತ ಆರೋಗ್ಯ ಸೇವೆಯನ್ನು ಮತ್ತಷ್ಟು ಬಲಪಡಿಸುವ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.